Ойунский-Слепцов П.А. Бырастыы

Материал из Олонхо Гипер Медиа
Перейти к: навигация, поиск

Платон Алексеевич Ойунский-Слепцов

Источник: Ойунский П.А. Сочинения. В семи томах. Том седьмой. – Якутск: Кн. изд-во, 1962. – 224 с. (Сс. 112-113).

П.А. Ойуунускай. Айымньылар. Сэттэ томнаах. Сэттис том. Ахтыылар, этиилэр, ыстатыйалар, кэпсээннэр. – Дьокуускай: Саха сиринээҕи кинигэ издательствота, 1962. – 224 с.— С. 112-113.


Кылгас комментарийдар. (Краткие комментарии). С. 219.

А. Е. Кулаковскай өлбүтүгэр суруллубут ыстатыйа. Урут «Кыым» хаһыат 1926 сыллааҕы бэс ыйын 18 күнүнээҕи нүөмэригэр бэчээттэммитэ.

Статья, написанная к смерти А.Е. Кулаковского. Напечатана в газете "Кыым" в номере от 18 июня 1926 года.



Бырастыы !!!

Өксөкүлээх Өлөксөй өллө диэн, Москуобаттан биллэрии кэллэ... Саха сиригэр ким билбэтэй, ким истибэтэй Өксөкүлээх Өлөксөйү?!! Сиртэн сиргэ, сылтан сылга сыҕарыйан сылдьан — саха тылын хомуйбут, умнуллубут тойуктары булбут, киһи аайы ааспыт олох быһыытын-майгытын тылынан кэпсээбит, сурукка бэлиэтээбит, ырыа оҥостубут Өлөксөй Кулаковскай өллө.

Былырыыҥҥы ааспыт дьылга Саха сирин норуотун үөрэҕин үрдүк суута Өксөкүлээх Өлөксөй үлэлээбит үлэтин, былыргы олох умнуллубут сыдьааттарын чинчийбит, билбит, ыйбыт үтүө үлэтин бэлиэтээн, аатын ааттаан, айхал эппитэ.

Өксөкүлээх Өлөксөй — аан маҥнайгы бүтүн Саха сирин үрдүнэн биллибит саха ырыаһыта-хоһоонньута, айар тыл аҕата. Өксөкүлээх Өлөксөй хоһоонньут эрэ буолбатах, кини саха былыргы олоҕун чинчиһитэ.

Онон саха норуота — бастыҥ хоһоонньутун, сахаттан маҥнайгы чинчиһитин сүтэрдэ. Кэнники кэлэр дьылларга саха үөрэҕин, саха тылын үөрэтэр дьоннор, Өксөкүлээх Өлөксөй үйэтэ оннук этэ диэн, туспа бэлиэтээн ааһыахтара. Сурукка суруллубут тыл үгэһэ, тыл хоһооно, айар санаа илбиһэ Саха сиригэр Өксөкүлээх үйэтиттэн ыла үөскээбитэ диэн бары этиэхтэрэ.

Өксөкүлээх өлбүтүн иһин — чинчийбит чинчиирэ хаалла, онтуката сылтан сылга дириҥээн иһиэҕэ. Суруйбут хоһооно, туойбут тойуктара, ыллаабыт ырыалара — саха норуотугар үйэттэн үйэҕэ бэриллэн, үөрэтиллэн иһиэхтэрэ.

Өксөкүлээх үөскээбит, олорбут, үлэлээбит бэлиэтэ хаалла, айар тылынан сүппэт, өлбөт гына дьүһүннэннэ.

Саха сирин чинчиһитигэр, саха норуотун аан маҥнайгы биллэр-көстөр хоһоонньутугар, Өксөкүлээх Өлөксөйгө — бырастыы этэбит... Бырастыы!!! Өксөкүлээх Өлөксөй кэриэһэ туоллун — «айар тыл уоттаннын!!!» «Тыл илбиһэ төлөннөннүн!!!».

Өксөкүлээх Өлөксөй — бырастыы!!!